Ndonëse situata në Shkodër ka shënuar përmirësim, me shumë se 1000 banesa janë ende nën ujë dhe 5234 hektarë tokë rezultojnë të përmbytur.
Sipas të dhënave të sotme të Ministrisë së Brendshme, në disa zona ku uji është larguar banorët janë kthyer në shtëpitë e tyre. "Ndërkohë kanë mbetur ende në evakuim 1795 persona. 593 shtëpi janë ende të përmbytura, ndërsa 450 të tjera janë të rrethuara nga uji"- thuhet në njoftimin zyrtar.
Të gjitha akset rrugore drejt komunave dhe fshatrave të prekura nga përmbytja janë të kalueshme nga të gjitha llojet e automjeteve. Përjashtim bën aksi rrugor drejt fshatit Obot në Komunën Ana e Malit si dhe aksi rrugor drejt Velipojës tek Ura e Gjo Lulit, e cila kalohet vetëm me mjete të rënda.
Procesi mësimor ka filluar dhe vijon normalisht në të gjitha shkollat në zonat e prekura nga përmbytja. Strukturat e Forcave të Armatosura, Bordit të Kullimit dhe Komunës Dajç, vazhdojnë punimet për riparimin dhe mbushjen me thasë rëre të argjinaturës së Dajçit, në pikat e Samrishtit, Darragjatit, Shirqit.